المكـــان مدينة الاقصـــر من اربع خمس سنين كدا , حوالى 7 - 8 شاب من أهل اسوان الأصليين , جايين عليا
اول واحد فيهم من غرب اسوان لابس عراجـى وفى ايده موبايل طالعه منه نغم الاغنية دى وبيتمايل معاها , وراه بخطوتيـــين واحد جـــعفرى من الخطـــارة بيتمايل وبيردد الكلام اللى جاى مع النغم , وعشان جعـــفرى فبيبشــر بايده مع الاغنيـــة
فى النــاحية التـــانية كنت انا واقف مبتسم , لا مش بس ابتسامة كنت بضحك
حمـــزة بيغنى فى الموبايل , وواحد ماتوكتى وواحد جعفرى بيردوا معاه
هو ايه اللى وادنى الاقصـــر اااقولكم بقه من بداية القصــة
انا مازن , نوبى نشئت فى اسوان , البندر زى مابيتقال عليه , فى حى اسمه مدينة ناصر , مدينة ناصر دا كان اعلى ربوة فى اسوان (قبل المحمودية) , واتبنت المدينة دى على ايد المهندسيين الروس اللى جم شاركوا فى بناء السد كسكن ليهم ( الله يفرم اللى جاب ابوهم , على اللى جابهم يبنوا السد) , اثنـاء وجودى هناك وتقريبا وانا فى خمسة ابتدائى , سمعنا عن المتحف النوبى الجديد اللى بيتبنى فى اسوان , الحق احنا فى اسوان بالمعنى الدارج البلد بـلدنا , يعنى اسوان معروفة اصلا بالنوبة , فحكاية المتحف , مشغلتش بالى اووى ساعتها ممكن يكون للاحساس ان انا اصلا فى النوبة , وممكن عشان صغر سنـــى , بس فى حاجة استفزتنى وقللت من شعورى بالعزة دا واللى فعلا البلد بلدنـا , الحاجة دى حصلت يوم افتتاح المتحف النوبى , المتحف اصلا بيبعد عن بيتنا حوالى كيلو ونص , وليه طريق طوالى كدا موازى للنيل من عندنــا , غير الطريق الاســاسى , يوم الحفلة دى اتوقعنا ان حفلة ومتحف نوبى فى اسوان ,يبقى بس فرصه جميلة لكل الناس تنبسط , بس اتفاجئنا ان فى ترتيبات اصلا من قبلها بيوم تقريبا , بتتعمل , عشان يتقفل طريق السادات اللى هو الطريق المؤدى للمطار واللى المتحف بيقع عليه) , طبعا فى مدينة زى اسوان هادية وصغيرة الحدث دا جلل , خصوصا ان الروح اللى كانت سايدةعن افتتاح المتحف كانت ايجابية , وكان فى عشم للناس انها تكون حاضرة فى ليل اسوان الجميل , بس للأسف عرفنا ان الحفلة دى للمخلوع وشلته بس , ودا كانت فعلا سايبة غصة فى حلقنا كدا , ( بقه ابن القحبة دا , يجى من مصر يفعدنا فى بيوتنا ومانقدرش نروح متحفنا اللى مابينا وبينه يادوب عشر دقايق) الفكرة كانت قاسية انك بتتقهر وسط ارضك , الناس كانت عارفة منير جااى الحفلة , فكانت الامانى عالية نقضى يوم حلو , مع منير فى اسوان ( ايام ما كنت بسمع له يعنى) , (سيبكم من حفلات الاوبرا , هناك فى بلادنا بيبقى حاجة تانى) , المهم اضطرينا نتابع زى كل الناس الحفلة على القناة التانية , كان جوايا شعور غبى جدا ( اتخيل انك شايف الانوار بتاعت المتحف من بلكونتك) وبتتفرج زيك زى اللى فى السنبلاوين على القناة التانية ( قهر قهر يعنى)
بداءت الحفــلة باستعراض هزلى من فرقة زفة نوبية , ماسكين الهوايات النوبى الصوف وشغاللين
"حسنــى فالا فينــا , مبـــارك فلافينــا"
, كترحيب بيه , لدرجة المخلوع وبسوء ضميره المعهود , ميل على ودن اللى جنبه يستفسر بيقولوا ايه دول؟
خصوصا ان ممكن تتسمع حســـنى بـــلاء فينـــا , وكانت هى الاقرب بلا شك للصواب
, خلص العرض الهزلى
وفضى المسرح من الهزليين , كان فى فترة كلام كدا حشو لحد ما المطرب اللى وراهم يطلع , فجاة لقينــا فى كرسى بيتحط
وجلابية برتقــــانــى لابسها واحد بعود قاعد وتصدر المشــــهد ,
الدخلة ذاتها كان صدمة , مين دا , مــين دا , ايه اللون دا , برتقانــى يا ابن اللذينة , ابويا دقق فى التلفزيون , قال دا حمزة علاء الدين , ولقيته انبسط كدا وعدل من قعدته تأهبا انه هينبسط زيادة لما يبتدى الغنـــا , انا مقتنعتش برضه اللى هو مين يعنى حمزة علاء الدين دا , اخويا ولا ايه ( اسمى الكامل مازن علاء الدين) , بس تحفز ابويا الحاد , وعدم احتماله لتعليقاتى السخيفة كمــا وصفها , اجبرنى انى ابلع لســـانى , بس شوية والراجل دا ابتدى يلعب عـــود , شوية والناس بقت تهدى , اللى بيسال مين دا , اللى بيعلق اى حاجة , بقه صوته بيخفت
وعالاقل اللى مندمجش زى ابويــا ,بس سكت لما شاف تـأثير غنــا الراجل دا على النوبيين اللى عاصروا التهجير
دا كـــان اول احتكاك مابينى انا وحمزة
------------
تانى احتكاك
فرح بنت عمــى , تقريبا حمزة علاء الدين مرحش افراح الا باصابع اليد الواحدة
او ممكن مرحش الا الفرح دا , انا اصلا معرفش هو راح ازاى ,
انا اصلا مرحتش الفرح دا , عشان كانوا كاتبيين فى الكــارت
(نتمنى للاطفال نومــا هادئــا)
النوبيين بقه لما يعملوا ولاد نــاس بيفقعوا
المهم مفرقتش , انا اصلا فى السن دا كنت بروح الافراح العب
, وساعتها كنا فى الاجازة , فيا جدعان شــارع الطنـــانى فى امبابة والشعلقة على العربيات ولا فــرح بنت عمى
اكيد هتقولوا الفـــرح , لا بس فى السن دا اكيد وطبعا الطنـــــانى
حمزة برضه فى الفرح اللى سمعته , ما عجبش الناااس ,
اصل الفرح دا كان فى ايام كان نـاصر ومنصور
واغنيتهم الشهيرة
"ياوردة يافـــلة"
هى اللى مكسرة الدنيــا , فازاى يجـى الراجل ايااه ابو جلابية برتقانــى , ويمسك عود فى وسط فـــرح ويغنــى , ويتوقع انهم ينبسطــوا
ازاى
دا كــان تـانى احتكاك مابينى وبين حمزة
وبرضه القدر بيتعنت بيجيبنا قريبين قوى من بعض
وبرضه ما بنتقابلــــش
-----------------------------------
المعرفة اللى على وســـع بقه
جت بعد انتهاء عصر07775000 , وكروت شحن النت , اللى الكارت كله يادوبك كان يخليك تعمل شــــااات , ايام ويندوز ملينيوم
طيــب اللـــه ثـــراه
بقى كل كومبيوتر فيكى يا مصــر , بديل طويل يسمى كــابل DSL , واتفتحت بقه منتديات نوبى , والعالم بقه فعلا قـــرية صغــيرة ( مفهاش حتى وحدة صحية) , اكتشتفت انا بــــقه الكنز , مش متذكر منتدى ايه بالظبط , بس قالك اسمع حمزة علاء الدين , قوللت ياااا
برضه الراجل دا تـــااانى ابو جلابية برتقانــى , طيب يا سيدى وادى دونلوود لاغنية , ورينا بقه بتقول ايه
اول حاجة شدتنى فى الاغانى , جودة الصـــوت المهولة والنقـاء فى التسجيل (لاحظ ان اغلب لاشرايط النوبى وقتها , كانت بتتسجل فى البرديسى فون , يعنى ادفو وامكانيتها الصوتية المذهلة)
تانى حاجة لقيت شدة العود بتــاعته غريبة , العود بيتكلم نوبى , مع انى انا اصلا بكره ام الالة دى , عشان وجودها فى اى تخت عربى بالنسبة للنوبى بتبقى محفز انه ياخد له قيلولة كدا , ويصحى ويلاقى نفس التخت بيلعب نفس اللحن
لقيت الاغانى بتاعته مش اغانى الافراح ( طبعا مع كامل احترامـى لاغانى الافراح) , لقيت فى كلام تــانى , فى تقديم للاغنية بشكــل تانى , لقيت نوبى صح زى بتاع جـاير والناس دى , اللى هى النوبى سك من غير تلج ولا مكسور بكلمة عربى
بقيت كل شوية اسمع له اكتر , واكتر واكتــر , والاقى غيرى نفس الكــلام
حمزة بيغنــى فـــاجيكــى , وتلاقى فى فـــرح من كلابشة حد بيغنى اغانيه , تلاقى واحد من سهيل حاطط اغنيته رنـــة
حمزة دوب الفرق اللى مش موجود اصـــلا
عارفين لما تكون واحد بس فاجيكـــى وسط 40 مــاتوكــى , وتسمع اغانى عز وصدقــى وتحفظها عشان بتحبها عن طـــريقهم
لما تعرف جزولى وعبد الصبور غلاب من صحبك بتـــاع "المضيـــق" , وصحبك بـــرضه بتـــاع الخطـــارة
يسمـع كل دا
ويجــى حمزة بـــرضه اول ما يقــــول
أســـرا ميـــــسو , تلاقى حناجر حتى ما تعرفش يعنى ايه الكلام بترد وراه بلغة صحيحة
تـــالا بـــاتسروا
جـــامن دول ســـو
اصــــــراا ميسو
جمرت توتا تالا بــاتسروا
جافنتى تود
جامدن دول سوج
جــيلافيــى نــايرى
جيلافـى
جـــيلافى نايرى جيلافــى
أصـــراا ميـــــــــسو
لما تلاقى واحد وحد الناس على ضحكة , على رنة عود جميلة , على لغة محبوبــة
دا بـــقه اللى كــان فى الأقــــــصر بيحصل فى فترة الدراسة بتاعتـــى هناك
كل واحد كان جــايب حاجة معاه يوريها للتانى
ناسنا الماتوكية جايبين عز وصدقى وطبعا حسن
نــاس الخطــارة كانوا جايبين اغانى سودانـى , محدش فعلا سمعها قبل كدا
كنت جايب البيسمبيس وفكـرى الكـــاشف
بس لو فى واحد اتفق عليه الكــل
بغض النظر بيغنى ايه وبلسان مين
هتلاقيه اكيــــد
حمزة علاء الديـن
------------------------
تنويه عــام
ممكن ككنزى لما تلاقى كلمة ماتوكى بتتقال كتير , تشعر بشىء غريب كدا
بيمشى جوا صـــدرك
لما تحـــس كدا عايز بس تعرف حـــاجة
صــدقنى انت مش كنزى ولا مـــاتوكــى
أكـتــــــــر منــــــى
انا كــلوده بالمنـاسبة
يالا انفــــــــــــــــــــــــــــيادر
