السبت، 30 يونيو 2012

Tupac اللـى شبــهــى

بداية مش قصدى عالملامح ولا اللون ولا اى شكل خارجـى , عشان مش عايز علامات استفهام من اولهـا


2Pac
زى ما هو معروف مغنـى راب , فى ناس تعرف عنه اكتر من كدا , فى نـاس تعرف اسمه وكام قصة خيالية كدا عليه , وفى نـاس تعرفه وتعرف تعمل حرف الـW كدا بصوابعها زى ما كان بيعمل افتخارأ بأنتمائه للساحل الغربى للراب




West Cost
 ودول الناس اللى بيحبوا يطلعوا فى الصور بمنظر الفاهمين والدايسين واحلى عصابات راب فيكى يا دنيـا وكدا مع ان  لو دققت فى صورهم هتلاقيهم فيهم اللى لابسين  كاب مكتوب عليه Ny 

اختصار لنيويورك "ساحل شرقى"وعاملة علامة الغرب بايده , طب ازاى يا ابن الناس , دا انت كدا كانك لابس عــراجـى وبتغنى
"من بحـرى وبنحبوه"
المهم سيبكم من توباك عند النـاس ايه
انـا المهم هنــا
بصوا فكرة الراب عندى , جت بعد دراسة محبتش اسمع حاجة مش فاهها , ولا عارف جت منين , دورت كتير على اصول المزيكـا دى , من يوم ما بدت باسطوانتين جااين من جاميكا واحد شغلهم وبقه يلعب فيهم بايده , لحد ما هى لسه مستمرة دلوقتى , الراب مش مجرد مزيكـا للناس تسمعها , لا الراب مزيكـا الناس تصنعها , موضوعاته هى يومنـا , امين شرطة رخم , على كهربـاء قطعة 3 ساعات , شغل مش موجود , على تعليم بـايظ , حتة حشيش بعشرين جنيه تعمل سجارتين بالعافية .
كل العك اللى بنقابله دا , يبجى حد يحكيه , يوصله للانسـان المتحضر ابن الناس اللى مش قاعد معانا ولا ميته زى مايتنا ولا يعرف حتى يعنى ايه الكهرباء تقطع ,
عجبتنى الغاية من الراب دا , الزعيق فى وش ظروف اصلا ماينفعش بنى ادم يتحط فيها عشان يحكى عنها , عرفت ان الفن دا متطرف غير كل انواع المزيكـا اللى طلعت من افارقة امريكـا ,  حزن البلوز , وعذوبية السول , ونغم الجـاز , الغنـا اللى كان بادب دا
خلاااص  , عجبنى اكتر انه مش لازم يبقى صوتى حلو عشان اعبر , لا ما انا صوتى اللى ضايع دا من كتر ام الماريجوانا اللى عمالى اطفحها من الصبح عشان مفيش شغل , فبثبت الناس تحت الكوبرى , عارفين اللى هو كل حاجة مرتبطة بالتانية , من شكل اللى بيغنى للى اصلا بيغنيه ,
بس عارفين لما كله يزعق ويقول ويشتم , اكيد هتلاقوا حد شتيمته غـير , اكيد حد بيشتم عشان عايز يشوف بكره فيه من غير شتيمة , واحد  اتقرص وادعك فغضب وحلم يتحرر هو ونـاسه ,



الحد دا كــان
Tupac Amaru Shakour
اول حاجة توبـاك امه كانت قيادية فى حزب الفهود السوداء
   The Black Panthers
شعــار حركة "الفهود السوداء"

أفانى شاكور مقبــوضا عليها

مــيلتــو شــاكور

فمفيش احسن من كدا تربية , عشان تطلع ناقم على مجتمع بيفشخك يوميـا لمجرد انك اسود , دا اصلا  لما كانت امه بتقضى عقوبة لاتهامها بالتأمر على
امريكـا
كانت ساعتها حـامل فيه


ووالده اللى رباه , اللى اتضح بعد كدا انه مش ابوه الحقيقيى , "مـيلتو شــاكور" كان لمدة 4 سنين على قـايمة ال FBI لاكثر عشرةهاربين مطلوب القبض عليهم


. دا اصلا حتى  اسمه توبـاك امارو , متاخد من اسم مناضل ثورى من شعب البيرو الاصلـى "الانكـا", قاد انتفاضة ضد المستعمرين الاســـبان,
فاللى انت اصلا رضعت مقاومة القهر بكــل صوره  اللى عشتها من يوم ما كنت فى رحم امك  حتى اسمك اللى اختارته ليك مكتوبلك تطلع شبهه,, واتربيت على كدا , انك فعلا تجيب حقك باللى تعرف تجيبه بيه
2pac  طفولته مكانتش سهلة ولا تربيته حتى كانت مثالية , فامه بكل نضالها كسيدة وكسوداء فى المجتمع الامريكـى , جت عليها فترة انهزمت وأدمنت المخدرات ودا اثرعلى سلوكها وسلوك اولادها


, ابتدى يتلم على تجار المخدرات , ابتدى يبيع عشان يبقى معاه فلوس , بس ما كترش ,

لف كذا مدينة من نيويورك لمريلاند وبالتحديد فى بالتيمور اللى التحق فيها بمدرسة الموهبيين فنيـا , وهناك اتعلم الشعر والتمثيل , الباليه , ومزيكـا الجــاز وعرف حد مهم جدا فى حيـاته وكون مع صحوبية جامدة , عرف "جـيدا بنيكيــت" اللى اغلب الناس مايعرفش عنها الا انها مــرات "ويل سميث"
بعد بالتيمور راح الغرب , كالفورينـا ومن هناك ابتدى
توباك مش مجرد Rapper زى ما قلت , توباك اتأثر بتاريخ عائلته واتأثر بالاوضاع اللى اتولد لقى نفسه كاسود فيها
عشان كدا نلاقيه فى أول اللبوم ليه

2Pacalypse Now

واللى بيعتبر من اعظم اللبومات الراب اللى طلعت
بيقول فى اغنية
Words Of Wisdom
:

No Malcolm X in my history text
Why is that
?
‘Cause he tried to educate and liberate all blacks
Why is Martin Luther King in my book each week
؟
He told blacks, if they get smacked, turn the other cheek
"
"
ليه ما بنقراش عن مـالكوم x  فى نصوص التـاريخ؟
عشان هو حاول يحرر ويثقف كل السود
,
وليه كل اسبوع نلاقى كلام عن مـارتن لوثر كينج جوا كتب المدرسة؟
عشان هو كان بيقول للسود , لو اضربت على خد من خدودك , اديهم التانى كمان عشان يضربوه
طبعا دا بيوضح قد ايه تربية امه اثرت عليه , خصوصا ان حركة الفهود السوداء , كانت افكار مالكوم X  المقاومة بالعنف , بتمثل جزء كبير من مرجعية الحركة , اللى كانت شايف ان المقاومة السلمية بقيادة مارتن لوثر كينج , مش جايبه همهـا
 وهودا تقريبا , أكتـر شبه مابينـى وبين توبـاك
بداية انا عارف ان اغلب النوبيين , مخلصيين لقضيتهم , وفعلا عايزين حقوقهم
بس الفكرة ان النوبيين فى شكل الحقوق دى وازاى تيجى مابينهم اختلاف كبير
فنلاقى مثلا جـيل الشباب فكره , غير الجيل الكبير
حتى جيل الشباب ذاته نلاقى فيه اختلاف فى الطريقة اللى تتجاب بيها الحقوق دى ,
اكون صريح اكتــر
اللى قعد هناك فى التهجير , مش زى اللى سمع عنه
اللى المية قطعت عليه وهو بيغسل وشـه , مش زى اللى بيروح البلد بيشكى من زن الناموس
اللى لما يتعب تعب جامد شوية بيسفروه اسيوط , مش زى اللى كبيره بياخد تأكسى للقصر العينى الفرنسـاوى


فى ناس معاناتها فى التهجير هو يومها من اول ما تصحى لحد ما تنام , وناس عارفين ان التهجير وحش ,وبلادنا كانت اجمل وكدا
التعرض للظلم بشكل مباشر , غير التعاطف معه ,
بالظبط زى الفرق اللى كان موجود مابين حركة الحقوق المدنية والفهود السوداء
الغـاية واحدة بس الطريقة تختلف
اللى فى مصر ادواته غير ليه طهقان ينـادى ويقول ويستنى تأثير كـلامه , اللى جااى من البلد
مــراره طــافح والاختلاف دا طبيعى عشان

التعرض للظلم بيخليك تكفر اول حاجة , بشركة الكهرباء اللى حرماك من نور فى ليل غميق
بعدها شركة المية اللى بقالها اربعين سنة وزيادة بتيجى فى المناسبات ,
شوية شوية , تحصل حادثة فى طريق كوم امبوا اللى مش متعد لبنى ادمين اصلا , فتكره  المحافظة
اللى استخسرت فيك اسفلت نضيف كان ممكن لو  موجود , ما يموتش حد عزيز عليك فى حادثة زى كدا ,
بتبتدى تتخلى شوية شوية وتكره تفاصيل يومك والقائمين على افساده
لحد ما توصل للراس الكبيرة
مـصر اللى هى سبب بلاك الاكــبر
ترجع لأصل الحكاية هتلاقى كل الدراما اللى انت فيها دى
من يوم ما طلعوك من بيتك , عشان يشربوا هما مية حنفية
غرقوا نخلك وارضك  , عشان ييروا اراضيهم طول السنة
القمر اللى كان ينور سمـاك يوم ما يبقى كـامل , حرموك منه عشان عيالهم
تلعب تحت  نـور عامود فى اى حـارة
وحتى دا , لما تلاقى انه كان ممكن يحصل من غير
ما تسيب ارضك ولا نخلك ولا سمـاءك , تبتدى تــشك
لا انا فعلا المقصود هنــا , انا كنوبى لو كنت قاعد حتى فى المريخ
كانوا هيجيولك يطلعوك منه بحجة استكمال ابحاثهم الفضائية
عاارف شعور انك انت مستهدف لمجرد طبيعة خلقك عليها ربنـا

لما ياخدك الشوق لبلادك دى , لو طلعت فى دماغك يعنى , تاخد دهبية كدا من ورا السد
تلف بيها المعابد اللى
فى بلادك , وتستنى لك اسبوع  لحد ما تصريح المخابرات يجـى
تتأكد بما ليس له مجال للشك
انك انت المستهدف يا معلم
تقولى بقه امن قومـى , امن صنـاعى , اى بتنجان
انت المستهدف كنوبى 
عشان انت نوبى


, الحقيقة دى وصلت لها من زمـان زى ما توباك كانت واصلة ليه فكرة انه طالما هو اسود ,وطالما بيتعامل كدا , هو فى نظرهم مش مواطـن
عشان كدا نلاقى تــوباك افتكس حـاجة كدا اسمــها
"Thug Life"
ووشم الكلمة على جــسمه

 معنى حرفى
"حياة بلطــجـى"
الفكرة اللى كان بيروج ليها توباك هنــا
هنا هو وضع تعريف للسود فى امريكـا , انه طالما
انا بتعامل مش بمساواة , طالما الاحياء بتاعتى مفهاش خدمات , طالما فى تعنت
من الحكومة ضدى , يبقى انا مش مواطن فى عنيكم انا بلطجـى
وعلى الرغم من النظرة دى فى عين توباك لمكانة السود فى المجتمع , وهى النظرة الحقيقية
المجردة من اى تفاءل كاذب او خداع باى مكسب شحيح , واللى مبنية على ظروف حياة يومية 
 الا انه كان بيحاول برضه على الجبهة الداخلية
لايجاد نوع من التحسن اللى يقدر مجتمع السود يقدمه لنفسه فنـلاقى ان


 توباك  قدر انه يعمل زى قوانين ملزمة  لعصابتى
"Cribz" & "Bloodz"

 بحيث ان يجنب المجتمع الاسود , انهم يبقوا طرف ما بين صراعهم ,
ووقع عليها قيادة العصابات دى , ودا اللى حد من جرائم , القتل العشوائية
والخطـا , خاصة مابين الاطفال والنســاء
,,


وهنـا بيبان ملمح تـانى من شخصية توباك وهو احترامه الكبير للمــرأة , بالرغم من ان اغلب مشاكله مع القانون
 جت من تحت راس المــرأة , الا ان وجود سيدتين فى حياته , الاولى امه واخته , وملازمته ليهم
اثرت على تربيته واحترامه الكبير للمراة
ودا بيظهر فى اغنية
"Keep Ur Head Up"
اللى بيقول فيها
And since we all came from a woman
Got our name from a woman and our game from a woman
I wonder why we take from our women
Why we rape our women, do we hate our women?
I think it's time to kill for our women
Time to heal our women, be real to our women
And if we don't we'll have a race of babies
That will hate the ladies, that make the babies
And since a man can't make one
He has no right to tell a woman when and where to create one"
 وبما اننا بنجيى من رحم نسـائنا , واللى بيختـار اسمنـا همـا نسـائنـا ,
انا بستعجب احنا ليه بنكره , بنغتصب ,بنسرق من نسـائنـا
دا الوقت اننا نموت نفسنا عشان نسائنا
نشفى جرح نسـائنا ,ونكون معاهم جـاديين

وبمـا اننا كرجال مانقدرش نخلق طفـل
فمش من حقنـا اننا نقول لنسائنا امتى وفين  انها تحمل اطفالنـا
"



----
ارجع تــانى للتشـابه
 جموح توباك مش صح طول الوقت ,
لا دا حيـاته فيها غلط وفيهـا شمال كتـير , ساعات الشمـال اللى فيها بيغطـى على النوايا الكويسة
وسـاعات النوايا الكويسة بتقدر تخلى الشمال يمين
بس دا اللى حـاصل معايا
مش طول عمرى الحد اللى أم الخير والصح مليه , لا ساعات انسان فعلا غريب
نقطة ضعفى عارفها كويس و وغلبتنى كتــير
بحاول شوية اتغلب
مرة بقدر مرتين بتجلى منى ,
بس هى كدا
الصراع الازلـى مابينى وبين نفسى
دا اكبر صراع
متهيالى توباك جموحه برضه على قد ما كان ميزته كان هو
بــرضه اللى بيبقى كتـير عيبه
لو اتوجهــه غلط ,
بالمنـاسبة صـــح انا اسم البلوتوث بتـاعى
 2Mass
على اسم بلدى
وهو اسمـه
2pac

حتـة بقه توفيق عكـاشة
لاحظ اول حـرف
:D

--------------

تــالت شبــه والاًصعب
الترحـال
 التنقل من كذا مكان فى حياتك , بيتعب فعلا
بس الفكرة مع توباك حصل العكس , هو لقى جذوره فى كالفورينـا
وانا سبتها فى أسوان , لا ما سبتهاش محبش الكلمة دى
بس انا جذورى هناك , ساعات بمد الفرع الف هنا وهناك , بس لا لازم ارجع ارتوى من جذرى
عارفة خبايا اسوان , اكتر من خبايا مصر , اخنانها ,
مين بيبيع احسن دخــانة , ولو انى مابشربهاش
كاتراكت دخل صيانة تانى بعد ما اتفتح السنة اللى فاتت , انا عارف برضه ليه
تحصل شكــلة مابين الجوزيرة والهلايل اللى حوليهم ,
اعرف لك كام واحد وقع فيها ,
تسـالنى تروح منشية نـاصر اللى فى مصر ازاى
ماعرفش ولو عاارف مش هقولك
انا هنـا بأدى رسالة بس
دايما فى بالى كدا , قامت ثورة اهه فى ام البلد العاقر دى
وجزء كبير انتهى من الرسالة دى , تانى مهمة والاهم حقــى كنوبى
ورااه ومش فايته , تحصل العودة بجد ونلاقى نفسنا مكتوبيين فى دستورنـا , هرستق امورى وارجع تومـاس البلد
"أيـركــى جــديم"
لا أسنــا ولا كوم امبوا
انتصارى مش عايزه معنوى انى كنوبى جيبت حقى وارضى واقعد كل عيد اروح هناك
لا  انتصارى انى كنوبى بمشى على ارضى دى , صهد الرملة اللى فيها حاسه على رجـلى
مـشوار ابن قحبة أخده لأسوان عشان اخلص ورق لارضى اللى على البحيرة
مستعد عادى اروح مش مشكـلة
بالمرة اعدى على غرب اسوان ,
عارف ان العودة مش سهــلة ولا هتبقى مـرتاحة الأمـور
بس نــــاوى وحاسبها
-------------
رابع شــبه
ازاى مـــات توبــاك
هو مـــات مقتول
انا عندى برضه نفس الفكرة انى هموت كدا , مش متضايق من الفكرة ذاتها
بس هتضايق لو مـت قبل ما نرجع بلدنـا
فى كـام حاجة عاايز اعملها قبل ما أمــوت
بس لو ربنــا حكم انى اموت قبلها
وصيتــى ليكم
"ادفـن فى تومــاس البلد القديمة , على ضفاف بحيرة النوبة"
مشوار عليكم انا عارف انكم تروحوا تدفنونى هنــاك

بس بطلوا أم الندالة دى
دا أخــر طــلب يا ولاد اللذينة
أدينــى هموت وسايبهالكم

ليست هناك تعليقات:

إرسال تعليق